De Mexicaanse Hond

Mangs blieft dingen ’t zölfde, mar ‘t zöt der wat anders oet. Nem noe de ‘geheime zenders’ oet de jaoren vieftig dee op de middengolf (AM) zaten. Ze dreeiden Olga Lowina, de Tiroler Holzhackerbuben en de Koekoekswals - en wieder ok nich völ soeps. Bij ’t ofstemmen met het greune oog op zonnen zender, joelden de Mexicaanse Hond oet de luudsprekker.

An praot van enige betekenis deuden ze nich. ’t Was illegaal, dus spannend. De PTT-Radiocontroledienst toerden mangs rond met auto’s met peilantenne. Mar de kwaojongs op de fietse op elken straothook, waorschouwden de ‘geheime zender’ aajt bietieds. Allenig bie ‘gecoördineerde verrassingsacties’ waren zendamateurs op heterdaod te betrappen.

Vandage ‘n dag hej nog immer illegale zendamateurs. Ze hebt zwaore FM-zenders staon, dee alle andere oetzendings oet de lucht blaost. Ze neumt zich ‘zendpiraten’ en praot van betekenis is nog steeds beteun. ‘Kom d’r mar even uit’, ‘Ik kom niet retour’ en ‘Doe eem een rapportje’ en dan hej ’t had. Dat was zo tot kortleden. Zo heinig an deuden ze wat meer an praoterij; d’r kwamen mangs vrömde mededelings lös. Zukswat as ‘Groeten an Aaltje, ze wet wal waorum’. En daormet gung ’t gangs.

Dit soort codes hef de argwaan van de opsporingsdiensten wekt. In de ‘strijd tegen het terrorisme’ bint ze alles an ‘t oflusteren en oftappen: oen telefoon (ok mobiel) en e-mail. Illegale zendpiraoten valt boeten dizze controle; heur starke zenders kunt gecodeerde berichten oetzenden veur alle volk ‘dat wat slechts in ‘t zin hef’. Ie könt oe begriepen, dat de Amerikaanse CIA samen met de Nederlandse inlichtingendeenst hiermet an ’t wark gung. De eersten actie is net achter de rugge. Nen olle PID-inspecteur har de naam ‘de Mexicaanse Hond’ bedacht (ok umdat he Amerikanen nich lieden kon).

Met zonnen ‘gecoördineerde actie’ wodden illegale zenders localiseerd en bespionneerd. Gineen hef dat in de smiezen had, umreden dat de CIA-leu ‘gecamoufleerd’ warkten. Ze reden in onopvallende auto’s, dee daags bie honderden bie de weg bint. Kiek om veer, vief uur ‘s middags mar op de A28: allendal bestelwagens en busjes van bouwbedrieven en zukswat. Dee riedt aajt as nen gek, dus dat tröf merakel best. Een tweede batterij politiewagens was keuzen oet de sector koeriersbedrieven. Dee bint ook aajt op pad en komt overal. ’t Valt oe nich meer op. Of misschien hej ze toch zeen staon bie dee plattegronden an ’t begin van de bebouwde kom? Of argens achteroet op ‘t Zuudeinde?

Beide soorten opsporingswagens stunnen ook geregeld op carpool- en andere parkeerplaatsen. Ie konnen weten dat ’t ‘aander volk’ was, umreden dat ze nooit nen bokking of cola kochten bie nen visboer of tankstation daorzoot. Aans haj ze weerkennen könt an heur jekkies, zunnebrillen en de oordöpkes met ’t snoertje in de nakke. Ze bleven ‘low profile’ en dat kuj van bouwvakkers en monteurs nich zeggen. De zenders Zwarte Piranha, de Buikdanseres en Brandend Zand (dizze namen bint hier um veiligheidsreden veraanderd) hadden heur speciale belangstelling. Ze wollen weten wel ‘Aaltje’ was en wat veur nen verdachte groepering d’r achter zat.

Op nen gegeven moment waren ze zeker van heur zaak. Vief wagens trokken op de locatie an van de Zwarte Piranha, twee gungen naor de Buikdanseres en twee naor Brandend Zand. Alles gung mis, het wodden malheur. Wat kwaojongens op nen scooter zagen op zundagmiddag nen batterij onbekende bouwvakbusjes heur dorp binnenrieden. 

Zee wusten sekuur wel in heur dorp biekluste en in wat veur wagens dee reden. Dit was nich vertrouwd. De jongens reden achterum naor ‘heur’ illegale zender, den acuut oet de lucht gung. De hele zenderpröttel wodden in heur eigen warkbus stopt en ze reden d’r rap met vot. Ginnen geheim agent gaf acht op dizzen bouwvakkerbus, want de actie ‘Mexicaanse Hond’ was groots opzet, ja. 

Bie de Buikdanseres was niks loos. Het hele pand stun leeg.Volgende wekke zol alles veur de vlakte gaon bie ’t bouwriep maken van een bedrieventerrein. De beide wagens dee Brandend Zand overvallen mussen, kwamen terecht bie nen dorpscafé, waor ze met völ kabaal binnenbanjerden en elkeneen wollen arresteren. Binnen vief minuten wodden alle geheime agenten de deur oetdonderd deur brulloftsgasten, dee dat gezeik van de veurige man van de bruid noe good zat waren. 

De CIA en politieleu hadden de oren d’r zowat lös bie hangen, de ogen dicht, de neuze kapot, het jek verropt, ’t oordöpke zat binnenin de gehoorgang stevig vasttimmerd en de zunnebrille waren ze kwiet. Een van heur koeriersbusjes wodden nog met nen trekker in de sloot mieterd. In de andere wagen gungen ze d’r vandeur. Op de N33 knalden ze tegen nen andere auto an. Alle gewonden mussen per traumahelikopter votbracht wodden. Heur ‘Mexicaanse Hond’ hef nog lange deurjankt, mar deurbieten? Ho maar. Aaltje krig nog steeds de groeten.

Harmjan van Steenwijk
(Dagblad vh Noorden 29/06/02)